擊退活塞男後，隔了整個小時，澤南才回復意識，而且躺在海濱公園的木椅上。
「呢……呢度係邊黎，個鐵板機械人呢。」澤南迷迷糊糊地說。
「恭喜你，年青人，全靠你擊退左活塞男，觀塘碼頭聽日就可以重開，之前活塞男霸佔左觀塘碼頭，攪到渡輪服務停止左。」白頭阿伯對澤南說。
「乜原來之前觀塘碼頭停駛，係因為活塞男，我仲以為冇人搭，所以停駛。」
「係啦，年青人，我覺得你好有潛質，你不如加入我地「廣西燒味」，保護鄉江，打倒李老闆，結束霸權統治。」白頭阿伯語重心長地說。
「唔好玩啦，同李老闆對抗，想死咩，比佢知我反佢，仲唔殺左我，而且邊有可能打倒李老闆。」澤南不停耍手擰頭說完。
「唔駛驚，我地有高科技掩飾你身分，而且有好多組織其實暗地同我地合作緊，打倒李老闆只係時間問題。」
「算啦，我冇興趣，我只係想做個普通市民，而且我唔得閒，聽日仲要搵工，走先。」澤南冷漠地拒絕白頭阿伯後就轉身想離去。
「咁唔緊要啦，本來我諗住用每個月十萬，一年十五個月糧，醫保，三十日有薪假同包伙食住宿黎請你，既然你咁決絕，我都唔迫你。」白頭阿伯無奈地說完，澤南即時停了下來，心想：「十萬一個月咪過百萬年薪，仲包住包食，係真唔係呀。」澤南於是立即倒後行，然後問個究竟：「十萬一個月，你講真定講笑，你地點比得起。」白頭阿伯傲慢地說：「我地有大財團支持，連機械人都做得起，乜你覺得十萬一個月會比唔起？」
澤南想了一想，覺得阿伯說得好像有道理，於是微笑回答：「其實我覺得保護鄉江真係好有意義，而且你地咁有誠意，我真係唔想拒絕你，想問下聽日返工得唔得。」
白頭阿伯拿出了一張卡，然後對澤南說：「冇問題，呢度有張八達窿，你帶住佢，聽朝去BQN地庫七仔，用張八達窿買少甜圍她豆奶就會搵到我，到時再詳細同你講。」
沒有留言:
張貼留言